હું મને – Gujarati Poetry | Japan Vora

આ ભીડ, આ લોકો, આ તહેવારની વચ્ચે

શોધતો રહ્યો હું મને

આ વહેવારના પડકારની વચ્ચે

શોધતો રહ્યો હું મને

લાગણીનાં માવઠા વરસ્યા ધોધમાર

કોરો રહીને બે ધારની વચ્ચે

શોધતો રહ્યો હું મને

પડઘા ઝીલવા પહોંચ્યો હું જેના

એના મૌનના સુનકારની વચ્ચે

શોધતો રહ્યો હું મને

દરખાસ્ત રજુ કરવા હું બોલું તે પહેલા

બરખાસ્ત કરેલા દરબારની વચ્ચે

શોધતો રહ્યો હું મને

આ વહેવારના પડકારની વચ્ચે

શોધતો રહ્યો હું મને