રામ રાખે દરકાર – A Gujarati Poetry by Swati Joshi
મારા રામ રાખે દરકાર,
કે હે જી, મારા રામ રાખે દરકાર!
આવન-જાવન શ્વાસની દોરી,
ઝાલે સીતાજીના ભરથાર -
હે જી, ઝાલે સીતાજીના ભરથાર.
મારા રામ રાખે દરકાર…
મન-મંદિરિયું ઝગમગ, ઝળહળ,
ભર્યો છે રામજી કેરો દરબાર -
હે જી, ભર્યો રામજી કેરો દરબાર.
મારા રામ રાખે દરકાર…
દલડાંની દેરીએ આનંદ-મંગળ,
વસે જ્યાં રામ બની ધબકાર -
હે જી, વસે રામ બની ધબકાર.
મારા રામ રાખે દરકાર…
પંચભૂતની પૂતળી રૂપકડી,
મારા રામજી એના કિરતાર -
હે જી, રામજી એના કિરતાર.
મારા રામ રાખે દરકાર…
રાખનું રમકડું તું રામનું ઘડેલું,
ન કર ‘આપવડાઈ’ લગાર -
હે જી, તારી ખુદની બડાઈ લગાર!
મારા રામ રાખે દરકાર…
ખોટપનાં ઠામણાં ઠાલાં ખખડે,
જગ આખું વંચનાનો વેપાર -
હે જી, જગ વંચનાનો વેપાર.
મારા રામ રાખે દરકાર…
મારે - તારે, સરજે - સંહારે,
પ્રભુના પરચા અપરંપાર -
કે, રામની લીલાનો નહીં પાર!
મારા રામ રાખે દરકાર,
કે હે જી, મારા રામ રાખે દરકાર!
કિરતાર = Creator, ઠામણાં = વાસણ, વંચના = deception/illusion, પરચા = divine act