એ ન્હોતી ખબર – Gujarati Poetry

બાર ગાઉએ બોલી બદલાય
પણ, બોલી ને બદલાય
એ ન્હોતી ખબર…

ભીની રેતમાં ઘર ઘર રમે
એવા ઘર ન ચણાય
એ ન્હોતી ખબર…

લીલુડાં ખેતરની લ્હાયમાં
પાનખર થઈ જવાય
એ ન્હોતી ખબર…

વાવ્યું હશે એવું લણ્યું હશે પણ,
આ ખેતર સાવ રણ હશે
એ ન્હોતી ખબર…

ચાલ્યા તો ખૂબ પણ પહોંચ્યા નહીં,
આ ટાંટિયા તૂટશે પછી
એ ન્હોતી ખબર…

આવીશ કહી ને બહાર જાય,
એ ફરી પાછા ના ફરે
એ ન્હોતી ખબર…

લાંબી સફરે નીકળેલ જહાજ,
વા વાતા પલટી ખાશે
એ ન્હોતી ખબર…

છું કહી ને હોય નહીં મેદાનમાં,
મેચ એવી પણ ફિક્સ થાય
એ ન્હોતી ખબર…

તૃષાતુર થતા પીતા હતા જે જળ,
ઝાંઝવાનાં નીકળશે
એ ન્હોતી ખબર…

મુમતાઝ માટે બંધાતા તાજમહેલમાં,
શહેનશાહની ખોદાઈ જશે કબર
એ ન્હોતી ખબર…